吉利汽車（00175）母公司吉利控股以18億美元成功收購富豪汽車（Volvo Cars），成為中國企業「走出去」步向全球化嘅最新例子，不過吉控在整個籌集資金過程，原來過程並不順利，本身是吉控董事長嘅李書福話，佢哋聯絡咗好多間銀行，最後只有建行（00939）願意參與收購有關嘅融資！

僅建行肯「放水」

吉控宣布收購富豪嘅計劃後，傳多家國有商業銀行願提供融資，但實情就差好遠，李書福自爆，話除建行外，根本無一家內地銀行願意借錢，部分甚至不客氣話風險太大，「借錢出來肯定是肉包子打狗（意謂有去無回）！」最後借錢梗係要靠外邊嘅銀行，外資銀行對收購嘅認同程度，甚至較作為「自家人」嘅內地銀行還要高。

另李書福透露會喺大陸建立達卅萬輛嘅本土產能，富豪將於內地建三家生產廠房，吉控旗下喺成都即將完工嘅廠房極可能成為富豪喺大陸其中嘅一個生產基地。