香港最發嘅係邊一行？有人話係金融，不過Emily覺得最發達嘅應該係做地產發展商，整到成街豪宅，仲有內地人願意借錢買，想唔發都唔得。民協立法會議員馮檢基近年搞社會企業搞到上癮，仲忽發奇想，同Emily講諗住整個社企地產發展商，整口的良心樓出嚟益市民同小商戶。
起良心樓 益市民小商戶
要做地產發展商絕對唔容易，更何况係咁創新嘅社企發展商。阿基講到好似要付諸實行咁，話可以由政府提供1億元起動費，然後向銀行借錢發展。Emily話銀行睇怕都唔會肯借錢畀佢啦，阿基反駁話自己有政府撐腰喎。
阿基又話，唔好睇死佢一定搞唔成，家搞吓搞吓佢已經有4間社企，而且社會企業搞大型事業喺外國都有例子，好似外國已經有社企銀行。Emily都想阿基做得成發展商，等一般小市民都有機會上樓嘛。